Алматыда зейнетақы мен жәрдемақы өседі

2026 жылдың 1 қаңтарынан бастап Қазақстанда мемлекеттік жәрдемақылар мен зейнетақылар 10%-ға артатын болады. Бұл өзгерістер ҚР Ұлттық Банкінің инфляция болжамына сәйкес жүзеге асырылады. Сонымен қатар, 2023 жылдан бастап бес жыл ішінде базалық зейнетақының ең төменгі мөлшері ең төменгі күнкөріс деңгейінің 70%-ына дейін, ал ең жоғарғысы 120%-ға дейін кезең-кезеңімен ұлғайтылады.

Зейнетақы мөлшерінің өзгерістері

2026 жылдың 1 қаңтарында базалық зейнетақының ең төменгі мөлшері 35 596 теңгені, ал ең жоғарысы 60 005 теңгені құрайды. Мысал ретінде, 2019 жылы зейнеткерлікке шыққан 70 жастағы зейнеткердің зейнетақысы 2025 жылы 171 588 теңге болды. 2026 жылдан бастап оның зейнетақысы 192 816 теңгеге дейін өседі, соның ішінде базалық зейнетақы 60 005 теңгені, ынтымақты зейнетақы 132 811 теңгені құрайды.

Жәрдемақылардың артуы

Мемлекеттік жәрдемақылар да өседі. Бір, екі, және үш бала туғанда берілетін жәрдемақы 149 416 теңгеден 164 350 теңгеге дейін, ал төрт және одан да көп бала туғанда – 247 716 теңгеден 272 475 теңгеге дейін артады. Көпбалалы отбасыларға берілетін жәрдемақылар да бала санына байланысты ұлғаюда: төрт баласы бар отбасылар үшін 63 030 теңгеден 69 330 теңгеге дейін, ал он баласы барларға – 157 280 теңгеден 173 000 теңгеге дейін.

Мүгедектерге арналған жәрдемақы

I топтағы мүгедектер үшін жәрдемақы мөлшері 101 702 теңгеден 111 872 теңгеге дейін, II топтағы мүгедектер үшін – 81 362 теңгеден 89 498 теңгеге дейін, III топтағы мүгедектер үшін – 55 474 теңгеден 61 021 теңгеге дейін артады. Сонымен қатар, Мемлекеттік әлеуметтік сақтандыру қорынан төленетін асыраушысынан айырылу және еңбек ету қабілетінен айырылу бойынша төлемдер де 10%-ға ұлғайтылады.

Бұл төлемдер міндетті әлеуметтік сақтандыру жүйесіне қатысушыларға мемлекеттік жәрдемақылармен бірге беріледі және олардың мөлшері жеке дара болады, соңғы 2 жылдағы орташа айлық табысқа, еңбек ету қабілетінен айырылу коэффициенттеріне, асырауындағы адамдар санына, сондай-ақ қатысу өтіліне байланысты есептеледі.