ӨНЕРКӘСІП МИНИСТРЛІГІ: ҚТӨ РЕЕСТРІНЕ ДЕЛДАЛДАРДЫ ҚАБЫЛДАМАЙДЫ

Қазақстан Республикасының Өнеркәсіп және құрылыс министрлігі соңғы уақытта Қазақстандық тауар өндірушілер Реестріне өнімдерді енгізу үшін "бастан аяқ сүйемелдеу" қызметін ұсынатын жарнамалардың артқанын атап өтеді. Осыған байланысты министрлік ресми мәлімдеме жасап, өнімдерді ҚТӨ Реестріне енгізу тек белгіленген ережелерге сәйкес жүргізілетінін және делдалдармен немесе басқа ақылы қызметтермен байланысудың қажеті жоқ екенін хабарлайды.

Ресми ақпарат көздері

Министрлік, сондай-ақ, ешқандай компанияға немесе жеке тұлғаға "жеделдету" немесе "жеңілдету" мақсатында коммерциялық қызмет көрсету үшін уәкілет бермегенін айтады. Кәсіпорындарға арналған барлық қажетті материалдар, нұсқаулықтар және кеңестер министрліктің және "QazIndustry" АҚ ресми сайттарында тегін түрде қолжетімді.

Тікелей өтінім беру

ҚТӨ Реестріне өтінімдерді тек кәсіпорындардың өздері тікелей береді. Министрлік бөгде тұлғалардың араласуы, құжаттар немесе электронды цифрлық қолтаңба (ЭЦҚ) беру қауіпсіздік мәселелерін туындатуы мүмкін екенін және компаниялардың деректерінің заңсыз пайдаланылуына жол беретінін ескертеді. Сондықтан кәсіпорындарды ресми ақпарат көздеріне жүгінуге және мұқият болуға шақырады.

Қосымша ақпарат

ҚТӨ Реестрі бойынша жаңалықтар министрліктің ресми сайтындағы арнайы бөлімде жарияланады. Тауар өндірушілер министрлікке сұрақтарымен тікелей хабарласа алады: e-Otinish порталы, электрондық пошта (e-ondiris@mps.gov.kz), арнайы чат (https://t.me/EONDIRISChat_bot) немесе 1465 байланыс орталығы арқылы.

Оқу вебинарлары

Кәсіпорындарға арналған оқу вебинарлары әр бейсенбі күні сағат 10:00-де өткізіледі. Қатысуға қажетті сілтемелер министрліктің және "QazIndustry" сайттарында жарияланады. Өткен семинарлардың жазбаларын мына сілтемеден көруге болады: https://www.youtube.com/@QazIndustry/videos.