Тараздағы азаматтарға скринингтер қолжетімді болады

2026 жылдың қаңтарынан бастап Қазақстанда медициналық көмектің бірыңғай пакетіне кезең-кезеңімен көшу басталады. Бұл пакет ТМККК мен МӘМС-ті нақты ажырату арқылы медициналық қызметтердің қайталануын болдырмайды. Сонымен қатар, аурулардың ерте профилактикасының қолжетімділігін арттыру және әлеуметтік мәні бар ауруларды ерте анықтау бойынша кепілдіктерді кеңейту жоспарлануда.

Скринингтердің қолжетімділігі

Медициналық көмектің жаңа пакеті шеңберінде онкологиялық аурулар, артериялық гипертензия, жүректің ишемиялық ауруы, глаукома және қант диабеті сияқты ауруларды ертерек анықтауға арналған скринингтер барлық азаматтарға, олардың МӘМС мәртебесіне қарамастан, қолжетімді болады. Бұл шаралар онкоскринингтердің жалпыға бірдей қолжетімділігін қамтамасыз етеді, соның арқасында қатерлі ісіктерді ерте сатыларда диагностикалау және емдеу мүмкіндігі артады.

Денсаулық сақтау жүйесінің тұрақтылығы

Бұдан басқа, ресурстарды қайта бөлудің арқасында денсаулық сақтау жүйесінің қаржылық тұрақтылығын қамтамасыз ету көзделген. Жаңа модельге көшудің нәтижесінде медициналық қызметтердің сапасы мен қолжетімділігі артып, азаматтардың денсаулығын қорғау деңгейі жоғарылайды.

Жүрек-қан тамырлары ауруларын, глаукоманы және қант диабетін уақтылы анықтау да асқынулардың алдын алуға және мүгедектікті азайтуға мүмкіндік береді. Осылайша, жаңа медициналық пакет халықтың денсаулығын жақсартуға бағытталған маңызды қадам болып табылады.